راولپنڈی/ اسلام آباد(این این آئی)وفاقی وزیر مملکت پانی و بجلی چوہدری عابد شیر علی نے کہا ہے کہ امن اور ترقی کا راستہ ہی پاکستان کی کامیابی کا راستہ ہے،وزیراعظم نواز شریف کی قیادت میںنیا سال 2015 پاکستان کے امن،ترقی اور خوشحالی کا سال ثابت ہوگا پاکستان اس وقت حالت جنگ میں ہے ان حالات میں فوجی عدالتوں کا قیام ضروری ہے جو ملک و قوم کیلئے بہتر ہے۔ ان خیالات کا اظہار انہوں نے گزشتہ روز ذرائع ابلاغ کے نمائندوں سے گفتگو کرتے ہوئے کیا۔ انہوں نے کہا کہ ہمارے عدالتی نظام میں اصلاحات لانے کی ضرورت ہے کیونکہ 10,10 سال سے زیر سماعت مقدمات کے فیصلے نہیں ہوئے۔ ہم حالت جنگ سے گزر رہے ہیں ہمارے جوانوں کو سرحدوں پر شہید کیا جا رہا ہے۔ عابد شیر علی نے کہا دہشتگردوں اور انتہاپسندوں کو ملک میں انکا ایجنڈا نافذ کرنے کی اجازت نہیں دی جائے گی۔ فوجی عدالتوں کے قیام کا مقصد عوام کے جمہوری حقوق کو تحفظ فراہم کرنا ہے۔ سانحہ پشاور بہت بڑا اور قومی سانحہ ہے۔ پوری سیاسی قیادت نے یہ فیصلہ کیا ہے کہ ہم ملکی سرزمین پر کسی کو بھی مسلح گروپ اور لشکر تشکیل دینے کی اجازت نہیں دیں گے، صرف پاکستان کے عوام اور پارلیمنٹ ہی یہ فیصلہ کرے گی کہ ملک میں کس قسم کا نظام رائج کیا جائے۔ شہدا کے خون کے طفیل پوری قوم دہشت گردی کے خلاف متحد ہو چکی ہے اور دہشت گردوں کے خلاف فیصلہ کن اور موثر اقدامات کا وقت آن پہنچا ہے۔ نیشنل ایکشن پلان پر اتفاق رائے قومی سیاسی قیادت کا تاریخی اقدام ہے۔ وفاقی وزیر مملکت پانی و بجلی نے کہا کہ انتہاپسندی اور دہشت گردی کا ہمیشہ ہمیشہ کیلئے خاتمہ کیا جائے گا اور نئی نسلوں کو محفوظ اور پرامن پاکستان دے کر جائیں گے۔ اچھے اور برے دہشت گردوں کی تمیز کئے بغیر سب کے خلاف یکساں موثر کارروائی ہو گی۔ انہوں نے کہا کہ غیر معمولی حالات میں غیر معمولی فیصلے اور اقدامات کرنا پڑتے ہیں اور یہی وجہ ہے کہ آج قومی قیادت ایک پیج پر آ چکی ہے۔
عابدشیر