عمران خان سے ملاقات، شادی کی مبارکباد، ورلڈ کپ کیریئر کا آخری ٹورنامنٹ ہے: شاہد آفریدی
اسلام آباد (نوائے وقت رپورٹ + نیوز ایجنسیاں) پاکستان تحریک انصاف کے چیئرمین عمران خان اور ان کی اہلیہ ریحام خان سے ٹی 20 ٹیم کے کپتان شاہد خان آفریدی نے ملاقات کی‘ شاہد آفریدی نے عمران خان اور ریحام خان کو شادی کی مبارکباد دیتے ہوئے انہیں تحائف پیش کئے۔ ملاقات کے دوران کرکٹ کے امور پر بھی زیر غور آئے۔ عمران خان نے ورلڈ کپ کے حوالے سے شاہد آفریدی کو ٹپس بھی دیں۔ تفصیلات کے مطابق اتوار کو بنی گالا میں قومی کرکٹ ٹیم کے آل رائونڈر اور ٹی 20 کے کپتان شاہد آفریدی نے عمران خان اور ان کی اہلیہ ریحام خان سے ملاقات کی۔ شاہد آفریدی نے دونوں کو شادی کی مبارکباد دیتے ہوئے نیک خواہشات کا اظہار کیا۔ انہوں نے کہاکہ شادی کا سن کر بہت خوشی ہوئی۔ امید ہے یہ شادی ان کی زندگی میں مثبت تبدیلی لائے گی۔ ذرائع کے مطابق عمران خان کی جانب سے شاہد آفریدی کی بار بی کیو سے تواضع بھی کی گئی۔ شاہد آفریدی نے نئے جوڑے کو تحائف بھی پیش کئے۔ ملاقات کے دوران کرکٹ کے امور بھی زیر غور آئے۔ عمران خان نے ورلڈ کپ کے حوالے سے شاہد آفریدی کو مفید ٹپس بھی دیں۔ آل رائونڈر شاہد آفریدی نے کہا ہے کہ ورلڈ کپ 2015ء ان کے کیریئر کا آخری معرکہ ہے جسے وہ یادگار بنانے کے لئے پوری کوشش کریں گے۔ اسلام آباد میں میڈیا سے گفتگو کرتے ہوئے شاہد آفریدی نے کہا کہ آئندہ ماہ آسٹریلیا اور نیوزی لینڈ میں شروع ہونے والا سپر میگا ایونٹ ان کے کیریئر کا آخری ورلڈ کپ ہے۔ اس میں شاندار کارکردگی سے امر ہونے کی کوشش کریں گے۔ پابندی کا شکار سعید اجمل اور محمد حفیظ کی بائولنگ میںکمی محسوس ہوگی۔ البتہ تمام خامیاں اور ناکامیاں بھلا کر میدان میں اترے تو جیت یقینی ہوگی۔
