سانگلہ ہل+ گوجرانوالہ (نمائندہ نوائے وقت+ نمائندہ خصوصی) ٹریفک حادثات، سانگلہ ہل میں 2 بھائی اور بھتیجا، گوجرانوالہ میں 2 نوجوان جاں بحق ہو گئے۔ تفصیلات کے مطابق سانگلہ ہل میںکینال روڈ بائی پاس پر شدید دھند کے دوران سیالکوٹ سے آنے والی تیز رفتار بس نے سامنے سے آنے والی موٹر سائیکل کو کچل ڈالا جسکے نتیجہ میں 3 نوجوان فیصل فہیم اور اسکے2 پھوپھا خلیل احمد اور محمد یونس موقع پر جاں بحق ہو گئے، موٹر سائیکل تباہ ہو گئی، بس ڈرائیور فرار ہو گیا۔ چک نمبر 28 لونگووال کے دو بھائی خلیل احمد اور محمد یونس گذشتہ روز اپنے سسرال محلہ احمد آباد میں محمد رفیق انصاری کے ہاں آئے تھے، اگلی صبح دھند کے دوران ان کے برادر نسبتی محمد رفیق انصاری کا بیٹا فیصل فہیم انہیں موٹر سائیکل پر انہیںگائوں چھوڑنے جا رہا تھا راستے میں کینال روڈ پر ریلوے پھاٹک کے قریب سیالکوٹ سے آنے والی تیز رفتار بس نمبری 4297 ایم این سی نے انہیںکچل دیا تینوں موقع پر ہی دم توڑ گئے، پولیس نے بس اور نعشیں قبضہ میں لے لیں اور نعشیں پوسٹمارٹم کے بعد ورثاء کے حوالے کر دی گئیں،2 حقیقی بھائیوں خلیل احمد اور محمد یونس کی نعشیں گھر پہنچیں تو پورے گائوں میں کہرام مچ گیا، والدین پر سکتہ طاری ہو گیا، ہر آنکھ اشکبار ہو گئی، تھانہ سٹی پولیس نے بس ڈرائیور ظفر اقبال کیخلاف مقدمہ درج کر دیا۔ علاوہ ازیں گوجرانوالہ میں ٹریفک حادثہ، 2 نوجوان جاں بحق ہوگئے۔ بمبوکی ورکاں کا 22 سالہ شاہد اپنے نامعلوم ساتھی کے ہمراہ موٹر سائیکل پر جا رہے تھے اعوان چوک کے قریب تیز رفتار آئل ٹینکر کی زد میں آ گئے جس کے نتیجہ میں دونوں نوجوان زخموں کی تاب نہ لاتے ہوئے دم توڑ گئے۔