ملتان (سپورٹس ڈیسک) جنید خان کی جگہ راحت علی کو ورلڈ کپ سکواڈ میں شامل کرنے کے اعلان پر کھلاڑی کے گھر جشن کا سماں رہا۔ نیو گل گشت کالونی ملتان میں انکی رہائش گاہ پر ہمسائے اور دوست احباب بڑی تعداد میں اکٹھے ہو گئے اور بھنگڑے ڈالے اور راحت علی اور پاکستان زندہ آباد کے نعرے لگائے۔ اس موقع پر راحت علی بھی موجود تھے ٹیم کے اعلان ہونے کے ساتھ ایک فون کال پر وہ فوری لاہور کیلئے روانہ ہو گئے۔راحت علی کے والد لیاقت علی نے کہا ہے کہ بیٹے کا ورلڈ کپ کیلئے ٹیم میں شامل ہونا اللہ تعالیٰ کی طرف سے تحفہ ہے۔ یقین ہی نہیں آ رہا کہ راحت علی کو میگا ایونٹ کیلئے ٹیم میں شامل کر لیا گیا۔ نوائے وقت سے خصوصی گفتگو کرتے ہوئے انہوں نے کہا کہ خوشی کے الفاظ بیان نہیں کر سکتا۔ دعا ہے بیٹا آسٹریلیا اور نیوزی لینڈ میں عمدہ کارکردگی کے ذریعے پاکستانی ٹیم کو کامیاب کرائے۔ انہوں نے کہا کہ بیٹے نے ٹیسٹ میچز میں ہمیشہ اچھی کارکردگی دکھائی اور اس بار خصوصی طور پر عمدہ کارکردگی دکھا کر ملک کا نام روشن کریں گے۔ ایک سوال پر انہوں نے کہا کہ راحت علی کی والدہ کا ورلڈ کپ سکواڈ میں نام کے اعلان پر خوشی سے آبدیدہ ہو گئیں۔ اہل خانہ نے بھرپور انداز میں جشن منایا اور یہ میرے لئے کسی اعزاز سے کم نہیں۔ لیاقت علی نے کہا کہ راحت علی کیلئے دوستوں‘ بزرگوں نے ہمیشہ دعا کی ۔