کراچی (سپورٹس رپورٹر) پاکستان انٹرنیشنل ائیر لائنز (وائٹس) اور پاکستان ریلوے نے بھی پانچویں قائداعظم گولڈ کپ ہاکی ٹورنامنٹ کے سیمی فائنل میں رسائی حاصل کرلی ہے، گروپ بی سے ان دونوں ٹیموں کے علاوہ گروپ اے سے دفاعی چیمپئن نیشنل بینک اور پاکستان کسٹمز کی ٹیمیں پہلے ہی سیمی فائنل میں جگہ بنانے میں کامیاب ہوچکی ہیں۔ پی آئی اے (وائٹس) اور دفاعی چیمپئن نیشنل بینک نے اپنی حریف ٹیموں پاکستان ریلوے اور پاکستان کسٹمز کو شکست دیکر اپنے، اپنے گروپ میں چیمپئن بننے کا اعزازحاصل کیا، پی آئی اے نے سات پوائنٹس کیساتھ اور نیشنل بینک نے نو پوائنٹس کیساتھ گروپ میں پہلی پوزیشن حاصل کی پاکستان کسٹمز نے چھ پوائنٹس اور پاکستان ریلویز نے بھی چھ پوائنٹس کیساتھ اپنے گروپ میں دوسری پوزیشن کیساتھ ناک آئوٹ مرحلے میں رسائی حاصل کی۔ پہلے میچ میں قومی چیمپئن پی آئی اے نے کپتان فل بیک کاشف علی کے پانچ گول کی بدولت ریلویزکو 10-1 سے شکست دیکر گروپ بی میں پہلی پوزیشن حاصل کرلی، کاشف علی کی ٹورنامنٹ میں یہ دوسری ہیٹ ٹرک تھی ۔ دفاعی نیشنل بینک نے میزبان پاکستان کسٹمز کی ٹیم کو دو کے مقابلے میں چھ گول سے شکست دیکر گروپ میں پہلی پوزیشن حاصل کرلی ۔ میچ میں کسٹمز کے سینٹرہاف محمد عاصم کو شاندار کھیل پیش کرنے پر مین آف دی میچ قراردیا گیا۔ ٹورنامنٹ لیگ میچز کا آج آخری دندو میچز کھیلے جائینگے۔