ویلنگٹن (سپورٹس ڈیسک) انگلینڈ کرکٹ ٹیم کے آل راؤنڈر معین علی نے کہا ہے کہ آسٹریلیا نے ان کی آنکھیں کھول دی ہیں۔ ہم سے میچ میں غلطیاں ہوئی تھیں مگر آئندہ غلطیوں سے سیکھ کر میدان میں اُتریں گے۔ یہ چوتھی مرتبہ تھا کہ میگا ایونٹ میں دونوں ٹیمیں آمنے سامنے آئیں اور حریف ٹیم مسلسل کامیاب ٹھہری۔ پہلے میچ میں کھلاڑیوں نے اچھی کارکردگی نہیں دکھائی جس کا خمیازہ بھگتنا پڑا۔ ہمارا پول بھی مشکل ہے مگر جمعہ کو ہونیوالے میچ میں حکمت عملی کے تحت کامیابی حاصل کریں گے۔ ٹیم مینجمنٹ اور کھلاڑیوں کے درمیان مشاورت ہوتی ہے اور آئندہ کے میچز کیلئے حکمت عملی تیار کر لی ہے۔ سکواڈ کو تنبیہہ کی گئی ہے کہ آئندہ اچھی کارکردگی کا مظاہرہ کریں ورنہ ورلڈکپ جیتنے کے خواب دیکھنا چھوڑ دیں اور کھلاڑیوں کو بھی اس کے نتائج بھگتنا پڑیں گے۔ کامیابی ہمارے لئے چیلنج بن چکی ہے۔