کوئٹہ (اے پی پی) ڈیرہ بگٹی میں فرنٹیئر کور نے سرچ آپریشن کے دوران 3مشتبہ افراد کو گرفتار کرکے اسلحہ برآمد کرلیا۔ ایف سی ترجمان کے مطابق اتوار کو ڈیرہ بگٹی کے مختلف علاقوں میں ایف سی نے سرچ آپریشن کے دوران 3مشتبہ افراد کو گرفتار کرکے انکے قبضے سے 2سب مشین گنیں،7میگزین ،279راؤنڈ اور مختلف اسلحہ کے 90راؤنڈ قبضے میں لے لئے۔ ایف سی نے گرفتار ہونے والے افراد سے تفتیش شروع کر دی۔ مزید برآں کوہلو میں سڑک کے کنارے نصب بم دھماکے سے پھٹ گیا۔ لیویز کے مطابق اتوار کو کوہلو کے علاقے میں نامعلوم افراد نے تخریب کاری کی غرض سے سڑک کے کنارے بم نصب کر رکھا تھا جو زوردار دھماکے سے پھٹ گیا تاہم کوئی جانی نقصان نہیں ہوا۔ لیویز نے نامعلوم افراد کے خلاف مقدمہ درج کرکے مزیدکارروائی شروع کر دی۔