کوئٹہ (نوائے وقت رپورٹ) بلوچستان کے ضلع نوشکی میں گاڑی پر فائرنگ سے دو پولیس اہلکار جاں بحق ہوگئے۔ پولیس کے مطابق دونوں اہلکار اے ایس آئی سلطان محمد اور سپاہی اعجاز آر سی ڈی شاہراہ پر معمول کی گشت پر تھے کہ نواحی علاقے کلی بٹو کے قریب نامعلوم موٹر سائیکل سواروں نے ان کی گاڑی پر فائرنگ کردی اور موقع سے فرار ہوگئے۔ فائرنگ کے نتیجے میں دونوں اہلکار موقع پر جاں بحق ہوگئے۔ پولیس نے علاقے کی ناکہ بندی کرکے ملزمان کی تلاش شروع کردی ہے۔ دوسری طرف ضلع تربت میں سڑک کنارے بم دھماکے میں ایک خاتون جاں بحق ہوگئی۔ لیویز ذرائع کے مطابق دھماکہ ہوشاب میں سڑک کنارے ہوا۔ نامعلوم افراد نے وہاں دیسی ساختہ بم نصب کیا تھا جوکہ زوردار دھماکے سے پھٹ گیا جس کے نتیجے میں وہاں سے گزرنے والی خاتون جاں بحق ہوگئی۔ علاوہ ازیں تربت کے نواحی علاقے تجابان میں دھماکہ ہوا۔ ذرائع کے مطابق دھماکے میں تعمیراتی کمپنی کا اہلکار زخمی ہوگیا۔ بم سڑک کنارے نصب کیا گیا تھا۔