ورلڈ کپ: انگلینڈ کو شکست دے کر بنگال ٹائیگرز کوارٹر فائنل میں پہنچ گئے، بنگلہ دیش میں جشن
ایڈیلیڈ (نوائے وقت رپورٹ+ بی بی سی) آسٹریلیا کے شہر ایڈیلیڈ میں کرکٹ ورلڈ کپ کے پول اے کے میچ میں بنگلہ دیش نے دلچسپ مقابلے کے بعد انگلینڈ کو 15 رنز سے شکست دے دی اور کوارٹر فائنل کے لئے کوالیفائی کر لیا۔ اس شکست کے بعد انگلینڈ کی ٹیم عالمی کپ مقابلوں کے ناک آئوٹ مرحلے کی دوڑ سے باہر ہو گئی ہے۔ بنگلہ دیش کے 275 رنز کے تعاقب میں انگلش ٹیم 49ویں اوور میں 260 بنا کر آؤٹ ہوگئی۔ بنگلہ دیش کے روبیل حسین نے چار جبکہ تسکین احمد اور مشرفی مرتضیٰ نے دو، دو وکٹیں حاصل کیں۔ انگلینڈ ایک موقعے پر 26 اووروں میں 121 پر دو وکٹیں تھیں تاہم 27 ویں اوور میں بنگلہ دیش نے دو وکٹیں حاصل کیں۔ ایئن بیل نے احتیاط سے بیٹنگ کرتے ہوئے 66 گیندوں پر سات چوکوں کی مدد سے نصف سنچری مکمل کی۔ انگلینڈ کو پہلا نقصان اس وقت ہوا جب معین علی 19 رنز بنا کر رن آؤٹ ہو گئے۔ انگلینڈ کے آؤٹ ہونے والے دوسرے کھلاڑی ایلکس ہیلز تھے جنہوں نے 27 رنز سکور کئے۔ 27 ویں اوور میں ایئن بیل 63 رنز بنا کر آئوٹ ہوئے۔ اسی اوور کی چوتھی گیند پر مورگن بھی آؤٹ ہو گئے۔پانچویں کھلاڑی 132 کے مجموعی سکور پر آؤٹ ہوئے۔ ٹیلر صرف ایک رن بنا سکے اور ان کو تسکین نے آؤٹ کیا۔ چھٹی وکٹ 163 کے مجموعی سکور پر گری جب جے روٹ 29 رنز بنا کر مشرفی مرتضی کا شکار بنے تاہم بٹلر نے جارحانہ بلے بازی کرتے ہوئے52 گیندوں پر 65 رنز بنائے۔ انہیں تسکین نے آؤٹ کیا۔ آٹھویں کھلاڑی کرس جارڈن بغیر کوئی رن بنائے رن آؤٹ ہوئے جبکہ سٹوارٹ براڈ کو روبیل نے بولڈ کیا۔ اس سے قبل انگلینڈ نے ٹاس جیت کر بنگلہ دیش کو پہلے بیٹنگ کی دعوت دی۔ بنگلہ دیش کا آغاز اچھا نہ تھا لیکن محمود اللہ اور مشفیق الرحیم نے عمدہ کھیل پیش کیا۔ محمود اللہ بنگلہ دیش کی جانب سے پہلے کھلاڑی بن گئے ہیں جنہوں نے ورلڈ کپ میں سنچری سکور کی ہے جبکہ محمود اللہ اور مشفق کے درمیان 141 رنز کی شراکت بھی بنگلہ دیش کی سب سے زیادہ شراکت ہے۔ محمود اللہ نے 138 گیندوں میں سات چوکوں اور دو چھکوں کی مدد سے 103 رنز بنائے اور وہ رن آؤٹ ہوئے۔ مشفیق نے 77 گیندوں میں آٹھ چوکوں اور ایک چھکے کی مدد سے 89 رنز بنائے۔ واضح رہے انگلینڈ کو کوارٹر فائنل تک رسائی حاصل کرنے کے لئے اس میچ میں بنگلہ دیش کو شکست دینا لازمی تھا۔ دوسری جانب بنگلہ دیش کو کوارٹر فائنل کے لئے کوالیفائی کرنے کے لئے صرف ایک جیت درکار تھی اور اس میچ میں فتح کے بعد بنگلہ دیش نے کوارٹر فائنل کے لئے کوالیفائی کر لیا ہے۔
