رینالہ خورد + اوکاڑہ + پپلاں(نمائندہ خصوصی+خصوصی نامہ نگاران) رینالہ خورد میں 40 من مرغیاں پکڑلیں‘ اوکاڑہ میں 150 کلو گدھوں کاگوشت برآمد کرلیا۔ تفصیلات کے مطابق رینالہ خورد میں محکمہ لائیو سٹاک نے 40 من مردہ مرغیاں لاہور لیجاتے ہوئے پکڑ لیں دو ملزمان کو گرفتار کرلیا ، گذشتہ روز ملزمان طارق ، شفیق سکنہ اوکاڑہ چالیس من کے قریب مردہ مرغیاں ڈالے میں لاد کر لاہور لیجا رہے تھے اطلاع پر لائیو سٹاک عملہ نے انہیں بستی رحیم بخش رینالہ کے قریب روک لیا اور انہیں سٹی پولیس کے حوالے کردیا پولیس نے ملزمان کو گرفتار کر کے ضروری کاروائی شروع کردی ہے۔ اوکاڑہ میں ویٹرنری آفیسر نے اطلاع ملنے پر عملہ کے ہمراہ چھاپہ مار کر بھاری مقدار میں گدھوں کا گوشت برآمد کرکے پانچ افراد کو قابو کرلیا۔ نواحی قصبہ راجوال میں چھاپہ مار کرپانچ افراد ذوالفقار، فیضی، محمد اسلم، فقیر علی اور محمد اعظم سے 150کلو یعنی 4 من گدھوں کا گوشت برآمد کرکے ان کو قابو کرلیا۔ پولیس نے ڈاکٹر عمران خان کی رپورٹ پر مقدمہ درج کرلیا ہے۔ علاوہ ازیں تحصیل کمپلکس پپلاں کے عقب میں خانہ بدوشوں کی جھگیوں میں چھاپہ، ایک شخص گرفتار کرلیا، اطلاع پر تحصیل انتظامیہ پولیس کی بھاری نفری، ویٹنری ڈاکٹر، ٹی ایم او رائو حامد رضا اور صحافی موقع پر پہنچے تو مکروہ دھندہ کرنے والے موقع سے فرارہوگئے تاہم ایک مشتبہ شخص کو حراست میں لے کر پولیس تھانے لے آئی جس سے تفتیش جاری ہے۔ دریں اثناء موقع واردات سے کئی گدھوں کے سر، چوپائے، تازہ کھال اور تازہ پنجر (ڈھانچہ) دیکھنے کو ملے ہیں۔