ایڈیلیڈ(سپورٹس رپورٹر)سابق کپتان وسیم اکرم نے کہا ہے خوشی کی بات ہے کہ پاکستان اور آسٹریلیا کے کوارٹرفائنل میں لیفٹ آرم فاسٹ بولرزکے درمیان مقابلہ ہوگا۔آسٹریلوی ٹیم میں مچل جانسن، مچل سٹارک اور جیمز فاکنر جبکہ پاکستانی ٹیم میں راحت علی اور وہاب ریاض شامل ہیں۔ موجودہ بولرز میں مچل سٹارک پسند ہیں ۔ ان کا قد لمبا ہے اور وہ گیند سوئنگ کرتے ہیں اسی لیے کامیاب ہیں۔انہوں نے نیوزی لینڈ کے فاسٹ بولر ٹرینٹ بولٹ کی تعریف کی۔انھوں نے پاکستانی بولرز کے بارے میں کہا کہ محمد عرفان کو اپنی فٹنس پر خاص توجہ دینے کی ضرورت ہے۔ وہاب ریاض نے زمبابوے، جنوبی افریقہ اور آئرلینڈ کے خلاف عمدہ بولنگ کی ہے۔وہاب ریاض کا سب سے بڑا مسئلہ کلائی کا تھا لیکن اب انھوں نے اس مسئلے پر قابو پالیا ہے جس کی وجہ سے وہ بہتر انداز میں ان سوئنگ کرنے لگے ہیں۔