لاہور (سٹاف رپورٹر) تھانہ ہربنس پورہ کے علاقہ میں کالج وین نہر میں گرنے سے 6طالبات زخمی ہو گئیں، وین ٹائر پھٹنے کی وجہ سے اچانک نہر میں جا گری۔ پولیس نے ڈرائیور کو حراست میں لے لیا جبکہ زخمی ہونیوالی طالبات کو طبی امداد کے بعد گھروں کو روانہ کر دیا گیا۔ معلوم ہوا ہے کہ گورنمنٹ ہوم اکنامکس کالج گلبرگ کی طالبات پرائیویٹ کالج وین میں گھرو ں کو جا رہی تھیں اسی دوران ہربنس پورہ انڈر پاس کے قریب اچانک کالج وین نمبرLHL- 212 کا ٹائر پھٹ گیا ۔ امدادی ٹیموں نے موقع پر پہنچ کر زخمیوں کو طبی امداد مہیا کی جبکہ پولیس بھی موقع پر پہنچ گئی اور وین ڈرائیور تصور حسین کو حراست میں لے لیا ۔ پولیس کا کہنا ہے کہ ڈرائیور کے پاس لائسنس نہیں تھا اسلئے اس کیخلاف مقدمہ درج کرلیا گیا ہے۔