مستونگ (ایجنسیاں + نوائے وقت رپورٹ) مستونگ کے علاقے کردگاب میں دہشت گردوں نے حملہ کرکے 5 آئل ٹینکرز جلا ڈالے جبکہ 4 ڈرائیوروں کو اغوا کرکے ساتھ لے گئے۔ تفصیلات کے مطابق مستونگ کے علاقے کردگاب میں دہشت گردوں نے آئل ٹینکروں پر فائرنگ کرکے 5 ٹینکروںکو جلا ڈالا جبکہ 3 آئل ٹینکروں کو جزوی نقصان پہنچا۔ حملے میں 5 ٹینکرز مکمل طور پر تباہ ہوگئے۔ واقعہ کی اطلاع ملتے ہی لیویز اہلکاروں نے علاقے کو گھیرے میں لے کر سرچ آپریشن شروع کر دیا ہے ۔ یہ آئل ٹینکرکراچی سے تیل لارہے تھے، سکیورٹی اداروں نے تحقیقات شروع کردی ہیں۔ لیویز فورس کے ذرائع نے بی بی سی کو بتایا کہ حملے کی زد میں آنے والے پانچ آئل ٹینکر کراچی سے تیل لے کر بلوچستان کے ضلع چاغی جارہے تھے کہ ان پر دہشت گردوں نے حملہ کیا۔ حملے اور اغوا کی ذمہ داری کالعدم تنظیم یونائیٹڈ بلوچ آرمی نے قبول کی ہے۔