کراچی(نوائے وقت رپورٹ) شہر قائد کے علاقے پیر آباد میں دہشت گردوں نے پولیس موبائل پر فائرنگ کردی تاہم موبائل میں موجود اہلکار محفوظ رہے فائرنگ کے تبادلے میں 2 دہشت گرد مارے گئے جن سے دستی بم اور اسلحہ برآمدہوا دونوں کی نعشیں ہسپتال منتقل کردی گئیں۔ پولیس نے علاقے میں سرچ آپریشن شروع کردیا تاہم دیگر حملہ آور فرار ہوگئے مرنیوالے دہشت گردوں کی فوری شناخت ظاہر نہیں کی گئی دریں اثناء پرانا گولیمار میں گٹر باغیچہ کے قریب سے 18 سالہ نامعلوم نوجوان کی بوری میں بند گولیاں لگی نعش ملی تاہم شناخت کا معلوم نہ ہوسکا کورنگی انڈسٹریل ایریا جلال کالونی میں حسین چوک کے قریب 2 گروپوں کے درمیان فائرنگ سے 4 افراد شدید زخمی ہوگئے۔ علاوہ ازیں نبی بخش پولیس نے شو مارکیٹ کے علاقے سے سیاسی جماعت کے ٹارگٹ کلر عبدالامیر ناظم آباد میں ایک امام بارگاہ کے قریب سے 2 دہشت گردوں یوسف شاہ اور حیدر شاہ کو دستی بم اور اسلحہ سمیت حراست میں لے لیا۔