لاہور (نامہ نگار+ سٹاف رپورٹر) نشتر کالونی میں گیس سلنڈر پھٹنے کے باعث آتشزدگی سے خاتون جھلس کر ہلاک ہوگئی۔ بتایا جاتا ہے گلزار ٹائون گلی نمبر ایک کے رہائشی جاوید مسیح کی 50 سالہ بیوی صفیہ 10 بچوں کی ماں تھی۔ گذشتہ روز گیس سلنڈر سے چولہے پر چائے بنا رہی تھی کہ اچانک سلنڈر زوردار دھماکے سے پھٹ گیا اور آگ لگ گئی جس سے صفیہ بی بی شدید زخمی ہوگئی۔ اسے طبی امداد کیلئے میو ہسپتال داخل کرایا گیا مگر وہ جانبر نہ ہو سکی۔ علاوہ ازیں سلنڈر دھماکے کے باعث علاقہ میں خوف و ہراس پھیل گیا۔ پولیس کے مطابق متوفی کے لواحقین کسی قسم کی کارروائی نہیں کرانا چاہتے تھے جس پر پولیس نے نعش ورثا کے حوالے کردی۔ مزید براں سٹاف رپورٹر کے مطابق نشتر کالونی کے علاقہ میں ہلاک ہونے والی خاتون کو سینکڑوں سوگواروں کی موجودگی میں نشتر کالونی کے قبرستان میں سپرد خاک کر دیاگیا۔