کراچی( نوائے وقت رپورٹ) ایم کیو ایم کے قائد الطاف حسین نے کہا ہے کہ عمران خان کو عزیز آباد آمد پر پیشگی مبارکباد دیتا ہوں، تحریک طالبان کے سربراہ عمران خان تشریف لائیں گے۔ عمران خان شہدا کی یادگار پر فاتحہ خوانی کریں۔ جناح گراﺅنڈ میں کارکنوں سے ٹیلیفونک خطاب کرتے ہوئے انہوں نے کہا کہ اسٹیبلشمنٹ کی پیداکردہ جماعتیں سامنے آرہی ہیں۔ تحریک انصاف جلسے کے دوران شہدا کی یادگار کا خیال رکھے۔ ایم کیو ایم کارکنوں کے روشن چہرے دیکھ کر بہت خوش ہوں، کوئی کسی سے زبردستی پیار کرسکتا ہے نہ کرا سکتا ہے۔ 23 اپریل کو عوام مجھ سے محبت کا اظہار کریں۔ 23 اپریل کو ہماری ماﺅں اور بہنوں کی فتح ہوگی۔ ایم کیو ایم کے کارکن 23 اپریل کو جیت کی تیاری کرلیں۔ 23 اپریل کو مجھ سے محبت کی پرچیاں ڈبے سے نکلیں گی۔ انہوں نے کہا کہ الیکشن کے روز مرد حضرات گھروں میں بیٹھیں، ماﺅں بہنوں کو ناشتہ بنا کر کھلائیں اور ووٹ ڈالنے کیلئے بھیجیں۔ کارکن پوری توانائی کے ساتھ 23 اپریل کو پولنگ سٹیشنوں پر جائیں، 23 اپریل کو ہماری ماﺅں بہنوں کی فتح ہوگی۔