لاہور(سپورٹس رپورٹر/ نمائندہ سپورٹس) آسٹریلیا میں چار ملکی ہاکی ٹورنامنٹ، جنوبی کوریا کے خلاف سیریز اور اولمپک کوالیفائنگ راؤنڈ کی تیاری کے لئے پاکستان ہاکی ٹیم کے ممکنہ کھلاڑیوں کا تربیتی کیمپ نیشنل ہاکی سٹیڈیم لاہور میں شروع ہو گیا۔بلائے گئے 36 کھلاڑیوں میں سے 32 نے رپورٹ کر کے تربیت کا آغاز کر دیا۔ پاکستان ہاکی ٹیم کے ہیڈ کوچ شہناز شیخ نے کہا کہ وقت کم اور مقابلہ سخت ہونے کی بنا پر کھلاڑیوں اور کوچنگ سٹاف کے لئے کوالیفائنگ راؤنڈ کسی چیلنج سے کم نہیں۔ ہوبارٹ آسٹریلیا اور جنوبی کوریا میں کھیلے جانے میچز سے کوالیفائنگ راؤنڈ کی تیاری میں مدد ملے گی تاہم یہ میچز کم ہیں۔ انہوں نے کہا کہ اسلام آباد لگائے جانے والے کیمپ میں پاکستانی ٹیم کے 11 کھلاڑی انجری مسائل کا شکار ہوئے۔ 29 اپریل تک کیمپ لاہور میں جاری رہے گا۔