اسلام آباد (جاوید صدیق) چینی صدر کے دورہ پاکستان کے سلسلے میں آج ہفتہ کے روز بے نظیر انٹرنیشنل ائرپورٹ پر فل ڈریس ریہرسل ہوگی۔ جس میں پاک فوج اور دوسرے ادارے چینی صدر کے استقبال کے سلسلے میں ریہرسل کریں گے۔ دریں اثناء وزارت خارجہ میں بھی چینی صدر کے دورہ پاکستان کے سلسلے میں اجلاس منعقد ہوں گے۔ نوائے وقت کو قابل اعتماد ذرائع نے بتایا ہے کہ چینی صدر اپنے دورہ کے موقع پر یادگاری پودا بھی لگائیں گے۔ اس سے قبل پودا لگانے کی تقریب منسوخ کردی گئی تھی۔ چینی صدر کا  طیارہ جب پاکستان کی فضا میں داخل ہوگا تو پاک فضائیہ کے طیارے اسے فضائی سلامی دے کر اپنی حفاظت میں ائرپورٹ تک لائیں گے۔ چینی صدر کے دورہ میں سکیورٹی کے غیر معمولی اقدامات کئے جارہے ہیں۔ چین کے صدر کی سکیورٹی کے لئے عوامی جمہوریہ چین سے سکیورٹی کی خصوصی ٹیمیں پاکستان آئی ہیں جو چینی صدر کے دورہ کے لئے کئے گئے سکیورٹی انتظامات کا جائزہ لے رہی ہیں۔