اسلام آباد (نمائندہ خصوصی) گلگت بلتستان قانون ساز اسمبلی کے انتخابات 8 جون کو ہونگے۔ وزیراعظم نے سمری پر دستخط کردئیے نوٹیفکیشن جاری کردیا گیا۔ گلگت بلتستان کو صوبائی درجہ ملنے کے بعد یہ دوسرے انتخابات ہونگے  جن کا انعقاد 8 جون کوکرانے کا اعلان کیا گیا ہے۔ الیکشن کمشن کے مطابق نوٹیفکیشن جاری ہونے کے بعد اب تین روز میں الیکشن شیڈول کا اعلان کیا جائیگا۔ یہ انتخابات گلگت بلتستان کے 7 اضلاع کے 24 حلقوں میں ہونگے۔ انتخابات کیلئے مسلم لیگ (ن)، پیپلز پارٹی، تحریک انصاف، جے یو آئی ، جماعت اسلامی اور متحدہ قومی موومنٹ سمیت مختلف چھوٹی بڑی جماعتیں حصہ لیں گی۔