لاہور+ حافظ آباد+ فیروزوالا (سٹاف رپورٹر+ نمائندہ نوائے وقت+ نامہ نگار)  مختلف علاقوں میں  57لاکھ کے ڈاکے، مزاحمت پر لاہور، حافظ آباد میں پرائز بانڈز ڈیلر سمیت 2 افراد کو فائرنگ کر کے  زخمی کر دیا۔ ریس کورس کے علاقہ میں ڈاکوئوں نے گن پوائنٹ پر کار سوار رفیق اور اس کی فیملی سے 14لاکھ روپے کی نقدی ، زیورات ، ریال، گلشن راوی میں افضل کے گھر گھس کر اہل خانہ کو یرغمال بنا کر 7 لاکھ روپے کی نقدی ، زیورات ، نصیر آباد میں قمر سے 3لاکھ 30 ہزار روپے ،اسلام پورہ میں ڈاکوئوں نے حامد بٹ سے 3لاکھ 70 ہزار روپے ، ہربنس پورہ میں ندیم سے 1لاکھ روپے نقدی و موبائل ،ملت پارک میں سلیم سے 1لاکھ 25ہزار روپے نقدی و موبائل ،سبزہ زار میں راحیل سے 1لاکھ 50ہزار روپے ،اقبال ٹائون میں رستم سے 56 ہزار روپے ،ڈیفنس بی میں محمود سے 48ہزار روپے ،ہنجر وال میں سبطین سے 52ہزار روپے ،نشتر کالونی میں ڈاکوئوں نے فیضان سے 1لاکھ روپے ،جوہر ٹائون میں ڈاکوئوں نے سعد سے 2لاکھ روپے ،چوہنگ میں اصغر سے 25ہزار روپے کی نقدی ،زیورات ،موبائل اور موٹر سائیکلوں سے محروم کر دیا۔  علاوہ ازیں کوٹ لکھپت کا حق  نواز جب  گھر پہنچا تو گیراج میں پہلے سے موجود تین ڈاکوؤں نے اسے یرغمال بنا لیا اور 13 ہزار کی نقدی موبائل چھین کر مزاحمت  پر  گولی مار دی جس سے  وہ زخمی ہوگیا۔ حق نواز کی حالت ہسپتال میں نازک بتائی جاتی ہے جبکہ سول لائن کے علاقہ میں سرفراز کے گھر سے  چور 8 لاکھ مناواں جی ٹی روڈ کی رہائشی مقصودہ کے گھر سے 5 لاکھ اور نشتر کالونی میں بابرہ کی  دکان سے 9 لاکھ کی نقدی اورگارمنٹس چوری کر لئے۔ حافظ آباد سے نمائندہ نوائے وقت کے مطابق حافظ آباد شہر میں 50لاکھ سے زائد کا ڈاکہ،  4ڈاکو پرائز بانڈ ڈیلر کو فائرنگ سے شدید زخمی کرنے کے بعد اس سے 50لاکھ روپے سے زائد کے بانڈز اور نقدی لوٹ کر فرار ہوگئے۔ سٹی پولیس خراٹے لیتی رہ گئی۔ حاجی معراجدین والہ کے پرائز بانڈز ڈیلر عرفان شبیر مین بازار حافظ آباد کے باہر پرائز بانڈز کی خرید وفروخت کی دکان بنا رکھی تھی۔ وہ رات آٹھ بجے کے قریب دکان بند کرکے کیش اور  بانڈز ایک بیگ میں ڈال کر موٹر سائیکل پر سوار ہوکر گھر کی طرف آرہا تھا جب وہ گلہ حاجی معراجدین والہ میں پہنچا تو دو موٹر سائیکلوں پر سوار چار ڈاکوئوں نے اسے لوٹنے کی کوشش کی، مزاحمت کی تو مسلح ڈاکوئوں نے  فائرنگ کرکے اسے شدید زخمی کردیا اور بعد ازاں اس سے 50لاکھ روپے سے زائد کے پرائز بانڈز اور نقدی لوٹ کر فرار ہوگئے۔ پولیس تھانہ سٹی وقوعہ کے نصف گھنٹے بعد پہنچی۔ زخمی ڈیلر کو ڈسٹرکٹ ہیڈکوارٹر ہسپتال پہنچا یا گیا جہاں تشویشناک حالت کے پیش نظر اُسے لاہور ہسپتال ریفر کر دیا گیا۔ فیروزوالا سے نامہ نگار کے مطابق ڈاکوئوں نے گن پوائنٹ پر کار سوار کو لوٹ لیا، دو موٹر سائیکل چھین کر لے گئے۔ اونچا پنڈ کے قریب ڈاکوئوں نے کار سوار خورشید عالم کو روک کر لوٹ لیا۔ ایک لاکھ روپے کی رقم، موبائل چھین کر لے گئے۔ ڈاکوئوں نے کوٹ عبدالمالک کے قریب شرافت علی کو روک کر لوٹ لیا، موٹر سائیکل اور رقم چھین کر لے گئے۔ ڈاکوئوں نے نوجوان سے موٹر سائیکل چھین لی چوروں نے آصف ندیم کے گھر داخل ہوکر تالے توڑ کر چار لاکھ روپے سامان چوری کرکے لے گئے۔ پولیس نے مقدمات درج کر لئے ہیں۔
ڈاکے