کیچ: گاڑی پر فائرنگ سے 2 افراد جاں بحق، حملہ آور فرار
کوئٹہ (نوائے وقت رپورٹ) بلوچستان کے ضلع کیچ کے علاقہ پلیدہ میں گاڑی پر فائرنگ سے دو افراد جاں بحق ہوگئے۔ لیویز ذرائع کے مطابق حملہ آور فرار ہوگئے۔
2 جاں بحق
مظفرگڑھ: منع کرنے کے باوجود رشتہ داروں کے ہاں جانے پر بیوی کو زندہ جلا دیا
شاہ جمال+ مظفر گڑھ (نامہ نگار+ نوائے وقت رپورٹ) مظفر گڑھ کے علاقے شاہ جمال میں رشتہ داروں کے ہاں منع کرنے کے باوجود جانے پر شوہر اور سسر نے خاتون کو آگ لگا کر مار ڈالا۔ پولیس نے مقدمہ درج کر کے دونوں کو گرفتار کر لیا۔ تفصیل کے مطابق نواحی موضع مانک پور کے رہائشی غلام محمد نے اپنی بیٹی شبانہ کی شادی اسی علاقہ کے محمد صدیق سے کر دی۔ شکی مزاج شوہر نے بیوی کو رشتہ داروں کے ہاں جانے سے منع کر دیا‘ نہ رکنے پر اسے شدید تشدد کا نشانہ بنایا اور اپنے باپ پیر بخش سے مل کر اسے آگ لگا دی۔ اطلاع پر پولیس تھانہ شاہ جمال نے مضروبہ کو فوری طور پر ہسپتال منتقل کیا جہاں سے اسے نشتر ہسپتال ملتان ریفر کیا گیا مگر شبانہ ہسپتال پہنچ کر دم توڑ گئی۔ لڑکی کے بھائی محمد اعظم کی مدعیت میں پولیس نے مقدمہ درج کر کے صدیق اور اس کے باپ پیر بخش کو گرفتار کر لیا۔
بیوی/ مار ڈالا
