چارسدہ + پشین (آئی این پی) امریکی قونصلیٹ پر متعین پولیس کانسٹیبل چارسدہ میں نامعلوم افراد کی فائرنگ سے جاں بحق ہو گیا۔ مقتول کے بھائی نے چارسدہ پولیس کو بتایا ہے کہ میرا بھائی علاقہ قاضی خیل جدید میں اپنے سسرال آیا تھا کہ نامعلوم افراد نے فائرنگ کرکے قتل کر دیا ہے۔ علاوہ ازیں  پشین کے علاقے سرانان کلی سرخاب میں خسرہ بچائو ٹیم پر فائرنگ کرنے والے 8 مبینہ دہشت گردوں کو گرفتار کرلیا گیا، فائرنگ میں ٹیم کے ورکرز محفوظ رہے، 2 حملہ آور زخمی ہوگئے۔ اطلاعات کے مطابق گزشتہ روز سرانان کلی سرخاب کے علاقے میں ٹیم بچوں کو قطرے پلانے میں مصروف تھی کہ ان پر مسلح افراد نے فائرنگ کردی جبکہ لورالائی میں ایف سی نے آپریشن کرکے 3دہشت گردوں کو حراست میں لے لیا، ملزموں کے قبضے سے بھاری تعداد میں اسلحہ بارودی مواد خودکش جیکٹس بھی برآمد کی گئیں۔ انسداد دہشت گردی فورس نے 4 ازبک باشندوں کو حراست میں لے لیا گیا۔ ملزموں کے قبضے سے غیرملکی موبائل فون اور افغان کرنسی برآمد کی گئی۔
دہشت گرد گرفتار