کابل (آئی این پی+آن لائن) افغانستان میں کار بم دھماکے میں2 پولیس اہلکاروں سمیت 3 افراد ہلاک اور 17 زخمی ہوگئے جبکہ افغان نیشنل سکیورٹی فورسز کی کارروائیوں میں  12 طالبان ہلاک اور 11 زخمی ہوگئے جبکہ 6 خودکش حملہ آوروں سمیت 23 کو گرفتار کر لیا گیا۔  پاک افغان سرحد پر سیکورٹی فورسز نے ناوا چیک پوسٹ پر افغان شدت پسندوں کا حملہ پسپا کر دیا۔ دوسری طرف 16 نئے وزراء نے حلف اٹھا لیا‘ حلف برداری کی تقریب  صدارتی محل میں ہوئی۔ یوں کئی ماہ بعد کابینہ مکمل ہوگئی۔ صدر اشرف غنی  نے نئی کابینہ کے ارکان کو بتایا کہ وہ  نجی ملاقاتوں کو  قبول نہ کریں اور لوگوں کی طرف سے لائے جانیوالے  کاغذ کے پھولوں کو قبول نہ کریں۔