بھارتی ریاست بہار میں طوفان بادوباراں سے تباہی‘ 33 افراد ہلاک‘ 100 زخمی
نئی دہلی (نوائے وقت نیوز+ اے پی پی) بھارتی مشرقی ریاست بہار کے کئی علاقوں میں شدید ترین طوفان بادوباراں اور آندھی سے 33 افراد ہلاک اور 100 سے زائد زخمی ہوگئے۔ بدھ کو بھارتی ذرائع ابلاغ کی رپورٹس کے مطابق کئی اضلاع میں آنے والی شدید طوفانی بارش اور آندھی سے درخت اور بجلی کے کھمبے اکھڑ کر گئے۔ بہار ریاست کے محکمہ ڈیزاسٹر مینجمنٹ کے پرنسپل سیکرٹری نے کہا ہے کہ طوفان زدہ علاقوں میں مواصلات اور بجلی کا نظام درہم برہم ہوگیا اور درخت گرنے کے باعث سڑکوں پر ٹریفک بھی رک گئی۔ سینکڑوں ایکڑ فصلوں کو بھی نقصان پہنچا ہے۔
