اسلام آباد + لاہور (وقائع نگار خصوصی + خبر نگار) وزیراعظم نواز شریف نے کنٹونمنٹ بورڈز کے انتخابات میں کامیابی پر مسلم لیگ (ن) کو مبارکباد دی ہے۔ وزیراعظم نے انتخابات میں شاندار کامیابی پر مسلم لیگ ن کے کارکنوں کو مبارکباد دیتے ہوئے کہا عوام نے ایک بار پھر مسلم لیگ ن پر اعتماد کا اظہار کیا ہے۔ مزید برآں نواز شریف‘ حمزہ شہباز‘ مریم نواز‘ پرویز رشید‘ سردار یوسف اور احسن اقبال نے راولپنڈی و چکلالہ کینٹ بورڈز کے انتخابات میں مسلم لیگ (ن) کی تاریخی کامیابی پر قومی اسمبلی کے رکن ملک ابرار کو دلی مبارک باد دی ہے اور کہا ہے کنٹونمنٹ بورڈ کے انتخابات میں عوام نے ایک بار پھر مسلم لیگ (ن) کے حق میں فیصلہ دے کر ثابت کر دیا 2013ء کے انتخابات منصفانہ اور شفاف تھے۔ وزیراعظم کے پولیٹیکل سیکرٹری ڈاکٹر آصف کرمانی نے ملک ابرار کو ٹیلی فون کرکے وزیراعظم کی طرف سے مبارک باد پہنچائی۔ وزیراعلیٰ پنجاب مریم نواز اور حمزہ شہباز نے بھی الگ الگ ٹیلی فون پر ملک ابرار کو مبارک باد دی۔ لاہور سے خبر نگار کے مطابق وزیراعلیٰ پنجاب محمد شہبازشریف نے کنٹونمنٹ بورڈز کے بلدیاتی انتخابات میں مسلم لیگ (ن) کے امیدواروں کی شاندار کامیابی پر انہیں مبارکباد دی ہے۔ وزیراعلیٰ نے کہا مسلم لیگ (ن) کے امیدواروںکی کامیابی پارٹی کی پالیسیوں پر عوام کے بھرپور اعتمادکا اظہار ہے اور کنٹونمنٹ بورڈز کے بلدیاتی انتخابات کے نتائج نے ثابت کر دیا عوام مسلم لیگ (ن) اور اس کی قیادت سے محبت کرتے ہیں۔ انہوں نے کہا نتائج نے الیکشن 2013 میں دھاندلی کا الزام لگانے والوںکو آئینہ دکھا دیا ہے۔ دھرنوں کے ذریعے ترقی کے سفر میں رکاوٹ ڈالنے والوں کو قوم کبھی معاف نہیں کرے گی۔