سبی (آئی این پی+نوائے وقت نیوز) سبی کے علاقے چاکر روڈ پر سبزی منڈی کے قریب بم دھماکے کے نتیجے میں 4افراد جاں بحق جبکہ 20زخمی ہو گئے، 2کلو گرام وزنی بم موٹر سائیکل میں نصب کیا گیا تھا۔ لوگ خریدوفروخت میں مصروف تھے حجام کی دکان کے باہر کھڑی موٹر سائیکل میں نصب بم پھٹ گیا۔ تین نعشوں اور اٹھارہ زخمیوں کو سول ہسپتال سبی میں جبکہ ایک نعش اور دو زخمیوں کو سی ایم ایچ سبی منتقل کر دیا گیا۔ 5زخمیوں کی حالت تشویشناک ہے۔ واقعہ کے بعد پولیس اور سکیورٹی فورسز نے علاقے کو گھیرے میں لے کر سرچ آپریشن شروع کر دیا۔ پولیس ذرائع کے مطابق دھماکے میں ڈیڑھ سے دو کلو بارودی مواد استعمال کیا گیا۔ دھماکے سے قریبی عمارتوں کے شیشے ٹوٹ گئے۔ صدر ممنون حسین، وزیراعظم نواز شریف، وزیر داخلہ چوہدری نثار علی خان، عمران خان، وزیراعلی شہباز شریف و دیگر نے دھماکے کی شدید مذمت کی جبکہ وزیراعلیٰ بلوچستان ڈاکٹر عبدالمالک نے واقعہ کی رپورٹ طلب کرلی۔ ادھر دریں اثنا نامعلوم افراد نے پنجگور کے علاقے پروم میں سکیورٹی فورسز کے کیمپ پر نامعلوم سمت سے راکٹ کے دو گولے فائر کئے جو کیمپ کے قریب کھلے میدان میں گر کر زور دار دھماکوں سے پھٹ گئے۔ سکیورٹی فورسز کی جوابی کارروائی پر حملہ آور فرار ہونے میں کامیاب ہوگئے۔ راکٹ حملوں میں کسی قسم کے نقصان کی اطلاع نہیں ملی۔