لاہور(سپورٹس رپورٹر/ نمائندہ سپورٹس) ایف ایم سی انٹرنیشنل سکواش چیمپئن شپ کا ٹائٹل ناصر اقبال نے جیت لیا۔ پنجاب سکواش کمپلیکس میں کھیلی جانے والی چیمپئن شپ کا فائنل میچ گذشتہ روز ناصر اقبال اور عامر اطلس کے درمیان کھیلا گیا جس کا پہلا سیٹ ناصر اقبال نے 11-8 سے اپنے نام کیا۔ دوسرے سیٹ میں بھی ناصر اقبال کو واضح برتری حاصل تھی تاہم عامر اطلس فٹنس مسائل کا شکار ہو کر میچ سے دستبردار ہو گئے۔ 21 منٹ کے کھیل میں عامر اطلس نے اپنے فٹنس مسائل کے باوجود میچ جاری رکھنے کی کوشش کی لیکن وہ اس میں کامیاب نہ ہو سکے جس پر ناصر اقبال کو چیمپئن قرار دیا گیا۔ چیمپئن شپ کے اختتام پر مینجنگ ڈائریکٹر ایف ایم سی فاروق شاہد نے کھلاڑیوں میں انعامات تقسیم کئے۔ ناصر اقبال کو وننگ ٹرافی کے ساتھ 2 ہزار 346 امریکی ڈالر جبکہ رنر اپ عامر اطلس کو ایک ہزار 605 امریکی ڈالر اور ٹرافی دی گئی اس موقع پر پنجاب سکواش ایسوس ایشن کے صدر امجد علی نون بھی موجود تھے۔