لاہور(سپورٹس رپورٹر/ نمائندہ سپورٹس) پاکستان ہاکی ٹیم ہوبارٹ میں چار ملکی ہاکی سیریز کھیلنے کے لئے آج صبح کراچی سے براستہ دبئی آسٹریلیا کے لئے روانہ ہوگی۔ قومی ٹیم کے کھلاڑی گذشتہ شام لاہور سے کراچی پہنچ گئے جہاں انہیں چیف سلیکٹر اصلاح الدین کی جانب سے الوداعی عشائیہ دیا گیا۔ پاکستان ہاکی فیڈریشن نے سلیکشن کمیٹی کی سفارش پر 18 رکنی سکواڈ کا اعلان کر رکھا ہے جس کی قیادت ایم عمران کر رہے ہیں۔ چار ملکی سیریز میں پاکستان کے علاوہ میزبان آسٹریلیا، نیوزی لینڈ، کوریا اور آسٹریلیا اے کی ٹیمیں شامل ہیں۔ ہیڈ کوچ شہناز شیخ کا کہنا تھا کہ گذشتہ سال دو انٹرنیشنل ٹورنامنٹ کے فائنل تک رسائی حاصل کی تھی اس مرتبہ بھی ہمیں بڑے چیلنجز کا سامنا ہے جس پر پورا اترنے کے لئے آسٹریلیا اور کوریا کے دورہ سے کھلاڑیوں کو تیاری کا بہترین موقع ملے گا۔ کھلاڑی اپنی پوری تیاری کے ساتھ جا رہے ہیں، قوم دعا کرئے انشااﷲ اچھے نتائج دینے کی کوشش کرینگے۔