لاہور (خبر نگار) شاہین ائر لائنز کی پرواز سے لاہور آنے والے عمرہ زائرین گذشتہ روز سارا دن جدہ ائرپورٹ پر پرواز کی پاکستان روانگی کے انتظار میں خوار ہوتے رہے۔ شاہین ائر لائنز کا عملہ ہر تھوڑی دیر بعد مزید تاخیر کی ’’نوید‘‘ سناتا رہا۔ جبکہ لاہور میں عمرہ زائرین کو لینے کیلئے آنے والے ان کے عزیز و اقارب سخت دھوپ اور گرمی میں ائرپورٹ کے باہر درختوں کے سائے میں پنکھا جھلتے اور ائر لائنز انتظامیہ کو بددعائیں دیتے رہے۔ اتوار کی صبح 5 بجے لاہور پہنچنے والی شاہین کی یہ پرواز رات گئے تک لاہور نہیں پہنچی تھی۔ علاوہ ازیں ائر بلیو کی کراچی سے آنے والی پرواز 3 گھنٹوں کی تاخیر کا شکار ہوئی جبکہ ائرانڈس کی کراچی آنے اور جانے والی پروازیں منسوخ ہو گئیں۔