لاہور (سپورٹس رپورٹر) پاکستان کرکٹ بورڈ کے زیراہتمام سپر ایٹ ٹی ٹونٹی ٹورنامنٹ آج سے اقبال سٹیڈیم فیصل آباد میں شروع ہوگا۔ ٹورنامنٹ میں 8 ٹیمیں حصہ لے رہی ہیں جنہیں دو گروپس میں تقسیم کیا گیا ہے۔ تمام ٹیموں کو مختلف کمپنیوں کی جانب سے سپانسر کیا گیا ہے۔ افتتاحی روز دو میچ کھیلے جائیں گے۔ پہلا میچ شام پانچ بجے راولپنڈی ریمز اور ایبٹ آباد فالکنز کی ٹیموں کے درمیان کھیلا جائیگا جس کے لیے قیصر وحید اور ندیم اقبال فیلڈ امپائرنگ کے فرائض انجام دینگے۔ دوسرا میچ سیالکوٹ سٹالینز اور پشاور پینتھرز کے درمیان رات 9 بجے شروع ہوگا۔ اس میچ کے لیے ضمیر حیدر اور آصف یعقوب امپائرنگ کے فرائض انجام دینگے۔ واضح رہے کہ پاکستان کرکٹ بورڈ نے ڈومیسٹک ٹورنامنٹ کی فاتح ٹیم کے لیے 20 لاکھ روپے انعامی رقم بھی مقرر کی ہے جبکہ رنر اپ ٹیم کو 10 لاکھ روپے نقد انعام دیا جائے گا۔