لاہور (نمائندہ سپورٹس+ سپورٹس رپورٹر) قومی ہاکی ٹیم اولمپکس کوالیفائنگ رائونڈ کی تیاری کیلئے محمد عمران کی قیادت میں جنوبی کوریا چلی گئی۔پہلا میچ اٹھارہ، دوسرا بیس، تیسرا بائیس اور چوتھا اور آخری میچ تئیس مئی کو کھیلا جائے گا، کپتان محمد عمران نے امید ظاہرکی قومی ٹیم کوریا کیخلاف شاندار کھیل پیش کریگی۔ کھلاڑی اچھی کارکردگی دکھانے کیلئے پر عزم ہیں ۔ ہار جیت کھیل کا حصہ ہے تاہم مختلف ٹیموں کیخلاف کھیل کر بڑے ٹورنا منٹس کی تیاری کر رہے ہیں ۔دونوں ٹیمیں آسٹریلیا میں ہونے والے چار ملکی ٹورنامنٹ میں دو مرتبہ ٹکرائیں تھی، دونوں میچز میں پاکستان نے فتح حاصل کی تھی۔ ستائیس مئی کو قومی ہاکی ٹیم وطن واپس پہنچے گی۔ اولمپکس کوالیفائنگ رائونڈ جو بیس جون سے بلجیئم میں شروع ہونا ہے۔