ملتان(نوائے وقت نیوز) ملتان میں زیرتعمیر عمارت کی چھت گرنے سے ملبے تلے دب کر ایک مزدور جاں بحق ہوگیا، مزدوروں کا عمارت کے ٹھیکیدار کے بیٹے پر تشدد۔ تفصیلات کے مطابق ملتان کے علاقے کینٹ چوک پر زیر تعمیر عمارت کی چھت گرنے سے ایک مزدور ملبے تلے دب گیا۔ واقعہ کی اطلاع ملنے پر ریسکیو ٹیمیں موقع پر پہنچ گئیں اور ملبے کے ہٹانے کا کام شروع کردیا تاہم ملبے سے مزدور کو مردہ حالت میں نکال کر نشتر ہسپتال کے سردخانے منتقل کردیا گیا۔ واقعہ کے بعد ٹھیکیدار کا بیٹا بھی وہاں پہنچا جس پر مزدوروں نے اس پر تشدد کیا۔ مزدوروں کا کہنا تھا کہ ٹھیکیدار کی نااہلی کے باعث مزدور عمارت کے نیچے آیا جس کے خلاف سخت کارروائی کی جائے۔ پولیس کے مطابق جاں بحق مزدور نوشا خان کی نعش پوسٹمارٹم کے بعد ان کے آبائی علاقے سوات بھیج دی جائے گی تاہم ٹھیکیدار کو پولیس نے حراست میں لیکر تھانے منتقل کردیا۔