شمالی وزیرستان (آن لائن) شمالی وزیرستان میں سکیورٹی فورسز کی دہشت گردوں کے خلاف فضائی کارروائیاں جاری، جیٹ طیاروں کی بمباری سے 9دہشت گرد ہلاک اور 3 زخمی ہوگئے۔ تفصیلات کے مطابق جمعہ کے روز سکیورٹی فورسز نے شمالی وزیرستان کے علاقے شوال اور لدھا میں خفیہ ٹھکانوں میں دہشت گردوں کی موجودگی کی اطلاع پر جیٹ طیاروں کی مدد سے شدید بمباری کی جس کے نتیجے میں 9 دہشت گرد ہلاک اور 3 زخمی ہو گئے۔ سکیورٹی حکام کے مطابق دہشت گردوں کے خلاف کارروائی کے دوران متعدد خفیہ ٹھکانے تباہ کر دیئے گئے اور بھاری مقدار میں اسلحہ بھی برآمد کیا گیا ہے۔ رپورٹ کے مطابق زخمی دہشت گردوں کو حراست میں لے لیا گیا ہے۔ ہلاک ہونے والے دہشت گردوں کا تعلق کالعدم تنظیم تحریک طالبان اور لشکر اسلام سے ہے جو خفیہ ٹھکانوں میں دہشت گردانہ کارروائیوں کیلئے منصوبہ بندی کر رہے تھے۔