چکوال + لاہور (نامہ نگار + خبرنگار) ڈمپر کی ٹکر سے ویگن سوار 6 افراد جاں بحق، 12 شدید زخمی ہو گئے۔ تفصیل کے مطابق مسافر ویگن راولپنڈی سے براستہ چکوال میانوالی جا رہی تھی گائوں ڈھرابی کے قریب تلہ گنگ کی طرف سے آنیوالے ڈمپر سے ٹکرا گئی جس کے نتیجہ میں 5 مسافر موقع پر جاں بحق 12 مسافر شدید زخمی ہو گئے۔ زخمیوں کو ڈسٹرکٹ ہسپتال اور دیگر مقامات پر منتقل کیا گیا جہاں ایک مسافر طبی امداد ملنے سے قبل ہی جاں بحق ہو گیا۔ جبکہ دیگر زخمی مسافروں کو طبی امداد دی جا رہی ہے جن میں سے تین مسافروں کی حالت تشویشناک ہے۔ جاں بحق ہونے والوں میں 30 سالہ ڈرائیور محمد الطاف میانوالی، رفعت بلقیس دختر عطا محمد، شاہ بلاول محمد یعقوب ثریا نور اور ایک نامعلوم شامل ہیں۔ وزیراعلی شہبازشریف اور گورنر پنجاب رفیق رجوانہ نے چکوال میں ٹریفک حادثے میں قیمتی انسانی جانوں کے ضیاع پر گہرے دکھ اور افسوس کا اظہار کیا ہے اور ہسپتال انتظامیہ کو زخمیوں کو بہترین طبی سہولتیں فراہم کرنیکی ہدایت کی ہے۔۔