گوجرانوالہ: رانا شمشاد کے قتل میں ملوث 4 ملزم گرفتار، ایک کو شناخت پریڈ کیلئے جیل بھجوا دیا گیا
گوجرانوالہ(نمائندہ خصوصی) مسلم لیگ (ن) کے مقتول ایم پی اے رانا شمشاد احمد خان کے قتل میں ملوث 4ملزمان کو سی آئی اے پولیس نے گرفتار کر لیا۔ گرفتار ملزمان میں نوید اصغر سکنہ لکھنے کے قصور،شہباز احمد سکنہ جلیل ٹاؤن، سیف اللہ سکنہ وڈالہ چیمہ وزیر آباد اور اویس طارق سکنہ لوڑھکی شامل ہیں۔ مفرور ملزمان کی گرفتاری کیلئے جا بجا ریڈ کئے جا رہے ہیں،گرفتارملزما ن نے دوران تفتیش اہم انکشافات کرتے ہوئے وقوعہ میں استعما ل ہونے والی 2کلاشنکوفیں اور گاڑی بھی برآمدکروائی۔ سٹی پولیس آفیسر محمد وقاص نذیر کے احکامات کے پیش ِنظر سی آئی اے پولیس سمیت دیگر سنیئر پولیس افسران پر مختلف ٹیمیں تشکیل دیں۔ ڈی ایس پی سی آئی اے عمران عباس چدھڑ کی زیر نگرانی ٹیم نے ملزمان کو ٹریس کر کے گرفتار کیا۔ سٹی پولیس آفیسر محمد وقاص نذیر نے ڈی ایس پی سی آئی اے اور ان کی ٹیم میں شامل افسران کو بہتر کارکردگی پر شاباش دی۔ علاوہ ازیں عدالت نے رانا شمشاد کے مقدمہ قتل میں گرفتار ملزم کو شناخت پریڈ کیلئے جیل بھجوا دیا، امتیاز احمد پر مشتمل انسداد دہشت گردی کی خصوصی عدالت میں تھانہ سٹی کامونکی پو لیس نے رانا شمشاد کے مقدمہ میں حراستی ملزم نوید اصغر کو پیش کیا۔ اس دوران فاضل عدالت نے کاروائی عمل میں لاتے ہوئے ملزم کو شناخت پریڈ کیلئے جیل بھجوا نے کا حکم دیا جس پر پو لیس نے ملزم کو جیل بھجوا دیا ہے ۔
