کراچی (کرائم رپورٹر + نوائے وقت رپورٹ) کراچی میں جمعرات کو تشدد زدہ نعش ملی ہے جبکہ فائرنگ کے واقعات میں 3 افراد زخمی ہوگئے۔ جمعرات کی صبح سپرہائی وے انڈسٹریل ایریا میں نعش جھاڑیوں میں پڑی ہوئی ملی۔ پولیس کے مطابق مقتول کی عمر تقریباً 35 سال تھی تاہم فوری طور پر اس کی شناخت نہیں ہوسکی۔ مختلف علاقوں میں فائرنگ سے زخمی ہونے والوں میں باران، عدیل اور عمر زخمی ہوگئے۔ شاہ فیصل کالونی نمبر چار میں اسلحہ سے بھری بوری برآمد کرلی گئی۔ جمشید کوارٹر کے علاقے میں بنوری ٹائون مسجد کے باہر موٹرسائیکل پر دستی بم رکھنے والا ملزم پیرآباد کے علاقے سے پکڑا گیا ملزم عبدالسلام کی گرفتاری بنارس پل کے نزدیک سے عمل میں آئی۔ کورنگی کے علاقے مہران ٹائون میں سوتیلے بیٹے نے بہنوئی کے ساتھ مل کر باپ کو چھریوں کے وار کرکے ہلاک کردیا جس کے بعد پولیس نے سوتیلے بیٹے کو گرفتار کرلیا اور اس کے بہنوئی کی تلاش شروع کردی۔ علاوہ ازیں فیروز آباد کراچی پولیس نے کارروائی کرکے 7 سالہ مغوی بچے کو بازیاب کرا لیا اور اغوا کار کو گرفتار کرلیا گیا ہے۔