لاہور (نمائندہ سپورٹس+ سپورٹس رپورٹر ) پروفیشنل سنوکر ورلڈکپ میں محمدسجاد اور حمزہ اکبر پر مشتمل پاکستانی جوڑی نے قطر کو 4-1 فریمز سے شکست دے کر دوسری کامیابی حاصل کر لی۔ اس فتح کے ساتھ ہی گرین شرٹس کی دوسرے رائونڈ تک رسائی کی امیدیں بھی زندہ ہو گئیں۔ چین میں جاری ایونٹ میں کھیلے گئے چوتھے گروپ میچ میں پاکستانی ٹیم نے حریف قطر کو باآسانی ایک کے مقابلے میں چار فریمز سے زیر کر کے دوسری کامیابی حاصل کر لی۔ اس فتح کے ساتھ پاکستانی ٹیم پوائنٹس ٹیبل پر 9 پوائنٹس کے ساتھ تیسرے نمبر پر موجود ہے اور اس کے دوسرے رائونڈ تک جانے کے امکانات بھی بڑھ گئے ہیں تاہم اسے اپنے آخری میچ میں آئرلینڈ کو 4-1 فریمز کے مارجن سے شکست دینا ہو گی۔ اگر آسٹریلیا کو بدترین شکست ہوتی ہے تو اس صورت میں گرین شرٹس کے دوسرے رائونڈ میں جانے کے امکانات مزید بڑھ جائیں گے۔