لاہور (نمائندہ سپورٹس) پاکستان کے فاسٹ باؤلرز اچھی لائن و لینتھ پر باؤلنگ کر کے میچ کو فیصلہ کن بنانے میں اپنا کردار ادا کر سکتے ہیں۔ وہاب ریاض ضرورت سے زیادہ باونسرز کر رہے ہیں۔ ان خیالات کا اظہار ٹیسٹ فاسٹ باؤلر عامر نذیر نے نوائے وقت کے ساتھ گفتگو کرتے ہوئے کیا۔ انہوں نے کہا کہ جنید خان کو ابھی تھوڑا وقت لگے گا۔ چوتھے روز پاکستان کے مڈل آرڈر بیٹسمینوں نے عمدہ کھیل کا مظاہرہ کیا ہے۔ ٹاپ آرڈر کے جلد آوٹ ہونے کے بعد اسد شفیق اور سرفراز احمد نے بہترین بلے بازی کا مظاہرہ کیا ہے۔ سرفراز احمد نے روایتی تیز بیٹنگ کرتے ہوئے دباؤ ختم کیا۔ اسد شفیق کو مستقل ٹیسٹ ٹیم کاحصہ ہونا چاہئے۔ ذوالفقار بابر نے بھی اچھی بلے بازی کی‘ اب میزبان ٹیم دباؤ میں ہے۔ پاکستان کو اس دباؤ سے فائدہ اٹھانا چاہئے۔ فیلڈنگ کے مطابق باؤلنگ کر کے سری لنکا پر دباؤ بڑھایا جا سکتا ہے۔ یاسر شاہ گیند کو تیز کرنے کی کوشش کرتے ہیں۔ فاسٹ باؤلرز کو بھی احتیاط کے ساتھ استعمال کرنے کی ضرورت ہے۔