کراچی (اے پی پی) پیپلز پارٹی کے چیئرمین بلاول بھٹو زرداری نے اتوار کو سول ہسپتال کراچی کا دورہ کیا اور گرمی سے متاثرہ مریضوں کی خیریت دریافت کی۔ پارٹی اعلامیہ کے مطابق وزیراعلیٰ سندھ قائم علی شاہ، صوبائی وزیر صحت جام مہتاب، سینیٹر شیری رحمان اور جمیل سومرو بھی انکے ہمراہ تھے۔ اس موقع پر سول ہسپتال کے ایم ایس نے چیئرمین بلاول بھٹو زرداری کو بتایا گرمی سے متاثرہ مریضوں کا علاج جاری ہے۔ بلاول بھٹو زرداری نے کہا جب تک گرمی کی لہر جاری ہے تب تک ہسپتال میں گرمی سے متاثرہ مریضوں کے علاج کیلئے ضروری سہولیات کے ساتھ خصوصی وارڈ قائم کیا جائے۔ انہوں نے مزید کہا تمام سرکاری ہسپتالوں میں گرمی سے متاثرہ مریضوں کے علاج کیلئے زیادہ سے زیادہ سہولیات مہیا کی جائیں۔