لاہور (کلچرل رپورٹر) معروف سٹیج ڈرامہ پروڈیوسر تماثیل تھیٹر کے چیئرمین قیصر ثناءاللہ نے کہا ہے کہ تماثیل تھیٹر کی تزئین و آرائش کردی گئی ہے۔ تھیٹر میں معیاری ڈرامے پیش کیے جارہے ہیں اور مستقبل میں بھی اچھے سماجی ڈرامے پیش کریں گے۔ انہوں نے کہا کہ سٹیج ڈراموں کے معروف فنکاروں سہیل احمد، افضل احمد اور مسعود اختر کے نقش قدم پر چلتے ہوئے سکرپٹ پر مبنی ڈرامے پیش کیے جائیں گے۔ مجھے ڈرامے پیش کرنے کیلئے معروف شخصیت سخی سرور کا بھی تعاون حاصل ہے۔ تماثیل تھیٹر کا چارج سنبھالے مجھے ایک سال مکمل ہو گیا ہے اور اس دوران معیاری ڈرامے پیش کیے ہیں۔ انہوں نے کہا کہ 7 اگست سے روزانہ 2 شو پیش کیے جائیں گے۔ 8 بجے والے شو میں سوشل ڈرامہ ہوگا اور 11 بجے والے میں کمرشل ڈرامہ ہوگا۔ فنکاروں کو میرٹ پر کام دیا جائے گا۔ عید پر بھی خوبصورت کھیل پیش کیا جائے گا جس کی تیاریاں جاری ہیں۔