کراچی (کرائم رپورٹر) سعید آباد بس ٹرمینل کے قریب دہشت گردوں نے پولیس موبائل پر دستی بم حملہ کر دیا پولیس نے فوری کارروائی کرکے کالعدم تحریک طالبان سواتی گروپ کے 3 دہشت گردوں عمران عرف بلال عرف ہمایوں ، زکریا عرف بھائی خان اور یونس عرف بابا کو گرفتار کر کے ایک دستی بم ، 3 پستول ، رائفل ، بم بنانے کا سامان، ڈیٹو نیٹر، بیٹریاں، سرکٹ اور دیگر سامان برآمد کر لیا۔ پولیس کے مطابق ملزمان بم بنانے کے ماہر تھے اور ملزمان نے سعید آباد میں بم بنانے کی فیکٹری بنا رکھی تھی۔ دریں اثناء اورنگی ٹائون کے سیکٹر ساڑھے گیارہ میں مسلح افراد نے فہیم جنرل سٹور پر فائرنگ کر کے 40 سالہ ندیم احمد کو ہلاک کر دیا۔ ادھر بفرزون کے علاقے کے بی آر سوسائٹی میں 25 سالہ جمیل کی پھندا لگی لاش ملی۔ پریڈی پولیس نے صدر کے علاقے کریک ڈائون کرکے 10غیر ملکیوں کو گرفتار کرکے اسلحہ اور منشیات برآمد کرلی جبکہ منگھوپیر پولیس نے مغل کانٹا کے قریب سے مقابلے کے بعد زخمی ملزم محمد خان ولد گل محمد کو گرفتا رکر لیا۔