کراچی: فائرنگ کے واقعات میں 2 افراد ہلاک، پولیس مقابلہ، بھتہ خور مارا گیا
کراچی (کرائم رپورٹر) کراچی کے مختلف علاقوںمیں فائرنگ کے واقعات میں دو افراد جاں بحق اور دو خواتین سمیت چار افرادزخمی ہوگئے۔ تفصیلات کے مطابق لیاری کے علاقے کمیلا کے سٹاپ کے نزدیک مسلح افراد کی فائرنگ سے عبدالحکیم دم توڑ گیا اور ایک خاتون ہزاری بیگم زخمی ہوگئی جب کہ آدم سٹی والی گلی میں بھی نامعلوم افراد نے ایک 23سالہ نوجوان کو فائرنگ کرکے ہلاک کردیا اور فرار ہوگئے ۔ادھر نیو کراچی کے سیکٹر الیون ایف میں نامعلوم افراد کی فائرنگ سے 18 سالہ رباب اکرم زخمی ہوگئی۔ سٹیل ٹائون کے علاقے میں ایک نوجوان رزاق کو فائرنگ کرکے زخمی کردیا گیا جب کہ اورنگی ٹائون میں نامعلوم سمت سے آنے والی گولی لگنے سے زخمی ہوگیا۔ ادھر شاہ فیصل کالونی پولیس نے ایک ٹارگٹ کلر کو گرفتار کرکے اسلحہ برآمد کرلیا۔ پولیس کے مطابق ٹارگٹ کلر قاسم کا تعلق ایک سیاسی جماعت سے ہے اور و ہ قتل کی متعدد وارداتوںمیں ملوث ہے علاوہ ازیں اینٹی کرپشن پولیس نے فراڈ میں ملوث محکمہ ماحولیات کے سپروائزر کو گرفتار کرلیا ۔اینٹی کرپشن حکام کے مطابق محکمہ ماحولیات کے سپروائزر الطاف ڈوگرنے نوکری دلانے کے بہانے ایک شخص سے ساڑھے گیارہ لاکھ روپے ہتھیالئے۔ بھتہ خوری میں ملوث بابا لاڈلہ گروپ کا ایک کارکن بھی پولیس مقابلے میں مارا گیا۔
