لاہور(سپورٹس رپورٹر) تہران میں جاری 18 ویں ایشین سینئر مینز والی بال چیمپئن شپ میں پاکستان ٹیم نے کویت کو تین دو سے ہرا دیا۔ پاکستان ٹیم نے اس میچ میں پہلے دو سیٹ جیت کر برتری حاصل کی تو اگلے دونوں سیٹوں میں کویت کی ٹیم نے کم بیک کرتے ہوئے مقابلہ دو دو سیٹ سے برابر کر دیا۔ میچ کے پانچویں سیٹ میں پاکستان ٹیم نے شاندار کھیل پیش کرتے ہوئے میچ اپنے نام کر لیا۔ پاکستان کی جانب سے میچ میں مبشر اور نصیر نے اچھے کھیل کا مظاہرہ کیا۔ پاکستان ٹیم اپنا اگلا میچ آج قازقستان کے خلاف کھیلے گی۔ پاکستان والی بال فیڈریشن کے چیئرمین چوہدری یعقوب نے کہا کہ پاکستان ٹیم کو اگلے سال بھارت میں ہونے والی ساؤتھ ایشین گیمز کی تیاری کے لئے مزید انٹرنیشنل میچز کی ضرورت ہے۔ اس سلسلہ میں وزارت بین الصوبائی رابطہ کمیٹی اور پاکستان سپورٹس بورڈ کو اپنا کردار ادا کرنا چاہئے۔