لاہور(سپورٹس رپورٹر) پاکستان اولمپک ایسوسی ایشن کے سابق سیکرٹری لطیف بٹ انتقال کر گئے۔ مرحوم ایشین سوئمنگ فیڈریشن کے نائب صدر کے علاوہ پاکستان سوئمنگ فیڈریشن کے بھی سیکرٹری رہ چکے ہیں۔ لطیف بٹ 14 سال تک پاکستان اولمپک ایسوسی ایشن کے سیکرٹری رہے۔ مرحوم کو لاہور کے مقامی قبرستان میں سپردخاک کر دیا گیا۔ نماز جنازہ میں کھیلوں کی تنظیموں کے عہدیداران سمیت مختلف شعبہ ہائے زندگی سے تعلق رکھنے والے افراد کی بڑی تعداد نے شرکت کی۔ پاکستان اولمپک ایسوسی ایشن کے صدر لیفٹیننٹ جنرل (ر) سید عارف حسن، سیکرٹری خالد محمود، پنجاب اولمپک ایسوسی ایشن کے سیکرٹری ادریس حیدرخواجہ، پاکستان فیڈریشن بیس بال کے صدر خاور شاہ، پاکستان باسکٹ بال فیڈریشن کے صدر بریگیڈئر راشد ملک، سیکرٹری خالد بشیر، پاکستان ہاکی فیڈریشن کے صدر اختر رسول، سیکرٹری رانا مجاہد، پاکستان فٹبال فیڈریشن کے صدر مخدوم فیصل صالح حیات، سیکرٹری کرنل (ر) احمد یار لودھی سمیت کھیلوں کی تنظیموں کے عہدیداران نے مرحوم کے انتقال پر گہرے دکھ و افسوس کا اظہار کرتے ہوئے ان کے بلند درجات اور لواحقین کے لیے صبر جمیل کی دعا کی۔ لطیف بٹ کی کھیلوں کی ترقی کے لیے خدمات کو کبھی فراموش نہیں کیا جائے گا۔ لطیف بٹ نے 1978ءمیں ایشین سوئمنگ فیڈریشن کی بنیاد رکھی تھی۔