فیصل آباد + قصور (نمائندہ خصوصی+ نمائندہ نوائے وقت) گھریلو حالات، فیروز والا میں خاتون، فیصل آباد‘ قصور میں 2 افراد نے زندگی ختم کرلی۔ تفصیلات کے مطابق فیروز والا میںگھریلو حالات سے دلبرداشتہ خاتون (س) نے زہریلی گولیاں کھا کرزندگی ختم کرلی۔ حالت غیر ہونے پر طبی امداد کے لئے ہسپتال لایا گیا جہاں وہ بے ہوشی کی حالت میں دم تو ڑ گئی۔ فیصل آباد میں جڑانوالہ کے علاقہ چک نمبر39 گ۔ب کا 40 سالہ لیاقت علی عرصہ دراز سے بے روزگار تھا گزشتہ روز غربت سے دلبرداشتہ ہو کر گندم میں رکھنے والی زہریلی گولیاں کھا لیں۔ متوفی کے بھتیجے عامر شہزاد کا کہنا ہے وہ بے اولاد اور بے روزگار تھا باہر سے ہی زہر کھا کر گھر آ گیا جہاں اس کی حالت خراب ہو گئی۔ قصور میں کوٹ حلیم خاں میں معاشی حالات سے دلبرداشتہ چار بچوں کے باپ نے پھندا لیکر خودکشی کرلی۔ صفدر معاشی حالات کی وجہ سے اکثر بے روزگار رہتا تھا جس کی وجہ سے گھر کے خرچہ کیلئے اکثر میاں بیوی میں جھگڑا رہتا تھا۔ گزشتہ روز بھی گھر میں لڑائی ہوئی تو صفدر نے دلبرداشتہ ہوکر خود کو کمرہ میں بند کیا اور گلے میں پھندا ڈال کر چھت کے ساتھ لٹک کر خودکشی کرلی۔