میانوالی (نامہ نگار) موسیٰ خیل کے قریب ڈھک پہاڑی کے مقام پر آئل ٹینکر اُلٹنے سے آگ بھڑک اٹھی جس کی زد میں آکر مزید تین ٹرک جن میں گندم اور دالیں لوڈ تھیں جل کر راکھ بن گئے۔آئل ٹینکر کی آگ کی وجہ سے قریب گزرنے والے سات سے زائد موٹر سائیکل بھی جل گئے اور ان پر سوار ایک خاتون سمیت 6 افراد جھلس گئے جن میں زینت، نصراللہ ،امیر نواز ، خضرحیات ، سیف اللہ اور ٹریفک کانسٹیبل حاکم خان شامل ہیں جنہیں فوری طور پر ریسکیو 1122 کے اہلکاروں نے موقع پر پہنچ کر ڈی ایچ کیو ہسپتال میانوالی پہنچایا جہاں پر زینت، نصراللہ اور امیر نوازکی حالت تشویشناک ہونے کے باعث انہیں پمز ہسپتال اسلام آباد ریفر کر دیا گیا۔ ڈھک پہاڑی پر راولپنڈی جانے والی تمام ٹریفک بند ہے تاہم متبادل راستہ کے ذریعے چھوٹی گاڑیوں کو جانے دیا جا رہا ہے جبکہ ریسکیو اہلکار اور پی اے ایف سے فائر فائٹرز نے آگ پر قابو لیا ہے۔