لاہور (نامہ نگار) صوبائی دارالحکومت کے مختلف علاقوں میں وارداتوں کے دوران متعدد شہریوں سے لاکھوں روپے مالیت کی نقدی، طلائی زیورات، موبائل فون، گاڑیاں، موٹرسائیکلیں اور دیگر سامان لوٹ لیا ہے جبکہ چور 2 گاڑیاں اور 11 موٹرسائیکل لے گئے۔ تفصیلات کے مطابق ڈاکوؤں نے فیصل ٹائون میں ساجد سے 15 لاکھ روپے مالیت کی کار اور نقدی، نصیر آباد کے علاقہ گلبرگ تھری کے رہائشی عبدالرحمن کے گھر گھس کر اہلخانہ کو گن پوائنٹ پر یرغمال بنا کر 8لاکھ روپے کی نقدی، طلائی زیورات، موبائل فون اور دیگر سامان، مصطفی آباد میں جہانزیب اور اس کی فیملی سے 4لاکھ روپے مالیت کی نقدی، طلائی زیورات اور موبائل فون، گلشن راوی میں آصف سے 50 ہزار روپے اور موبائل فون، گجرپورہ میں ارشاد سے 28 ہزار روپے اور موبائل فون، لٹن روڈ میں دستگیر سے 20 ہزار روپے اور موبائل فون لوٹ لیا ہے۔ چوروں نے شالیمار میں ایک دکان سے 7لاکھ روپے مالیت جبکہ ڈیفنس میں ایک گھر سے 5لاکھ روپے مالیت کی نقدی و سامان چوری کر لیا ہے۔ چوروں نے گرین ٹاؤن سے عدیل، ڈیفنس سے قدیر کی کاریں جبکہ مصری شاہ سے اشتیاق، لوئرمال سے ارشد، شادباغ سے امان، مزنگ سے عمر، لٹن روڈ سے آصف، وحدت کالونی سے فاروق، سمن آباد سے جبار، گلشن اقبال سے سعید، نواب ٹائون سے لیاقت اور بوٹا، جوہرٹائون سے عارف کی موٹرسائیکلیں چوری کر لی ہیں۔