گوجرانوالہ (نمائندہ خصوصی) گوجرانوالہ میں تیزرفتار ٹرک اور موٹر سائیکل کے درمیان خوفناک تصادم کے نتیجے میں باپ دو بچوں سمیت جاں بحق ہو گیا، ریسکیو ٹیموں نے نعشیں ڈسٹرکٹ ہسپتال منتقل کر دیں۔ نوکھر کا محنت کش جاوید اپنی چار سالہ بیٹی میرب اور 12 سالہ بیٹے وائبر مسیح کو چھٹی کے بعد سکول سے لیکر واپس گھر جا رہا تھا راستے میں نوکھر اڈے کے قریب انکی موٹر سائیکل مخالف سمت سے آنیوالے تیزرفتار ٹرک کے ساتھ ٹکرا گئی جس کے نتیجے میں جاوید اور اسکی بیٹی میرب مو قع پر ہی جا ں بحق ہو گئے۔ ادھر یہ بھی معلوم ہوا ہے کہ حادثہ کے دوران شدید زخمی ہونے والے وائبر مسیح کو تشویشناک حالت میں فوری طور پر طبی امداد کی فراہمی کے لئے مقامی ہسپتال منتقل کیا گیا جہاں پر وہ بھی موت و حیات کی کشمکش میں مبتلا رہنے کے بعد جان کی بازی ہار گیا تاہم ریسکیو اہلکاروں نے نعشوں کو ضروری کارروائی کے لئے ڈسٹرکٹ ہسپتال منتقل کر دیا دوسری جانب پولیس نے کارروائی شروع کر دی ہے۔