نئی دہلی (آئی این پی) مشرقی بھارت میں ماؤ نواز علیحدگی پسندوں نے کارروائی کرتے ہوئے 3 بھارتی فوجیوں کو ہلاک جبکہ6 دیگر کو زخمی کر دیا۔ بھارتی میڈیا کے مطابق واقعہ اْڑیسہ ریاست کے ضلع ملکانگری میں پیش آیا۔ پولیس نے بتایا کہ گھات لگا کر کیے گئے اس حملے میں پہلے بارودی سرنگوں کا استعمال کیا گیا اور بعد ازاں باغیوں نے بارڈر سکیورٹی فورس پر فائرنگ شروع کر دی۔ بھارت کے وسطی اور مشرقی علاقوں میں ہزاروں مسلح باغی اپنی کارروائیاں جاری رکھے ہوئے ہیں۔ بھارت میں ماؤ نواز علیحدگی پسندوں کی اس بغاوت کے نتیجے میں اب تک ہزاروں افراد ہلاک ہو چکے ہیں۔