لاہور (خصوصی رپورٹر) نظریۂ پاکستان ٹرسٹ کے زیراہتمام ایوان کارکنان تحریک پاکستان ، شاہراہ قائداعظم لاہور میں آج بروز اتوار 10 بجے صبح یوم دفاع کے موقع پر ایک خصوصی تقریب منعقد ہورہی ہے۔ اس تقریب کی صدارت تحریک پاکستان کے مخلص کارکن، سابق صدر اسلامی جمہوریہ پاکستان و چیئرمین نظریۂ پاکستان ٹرسٹ محمد رفیق تارڑ کریں گے۔ مقررین میں وائس چیئرمین نظریۂ پاکستان ٹرسٹ پروفیسر ڈاکٹر رفیق احمد، چیئرمین تحریک پاکستان ورکرز ٹرسٹ کرنل (ر) جمشید احمد ترین، میجر جنرل (ر) محمد جاوید، بریگیڈئر (ر) ممتاز احمد خان (ستارۂ جرأت)، کرنل (ر) سلیم ملک، ڈاکٹر اجمل نیازی اور بیگم مہناز رفیع شامل ہیں۔ تقریب کے اختتام پر 11:30 بجے صبح یادگار شہداء (جی ٹی روڈ مناواں) پر حاضری دی جائے گی، پھولوں کی چادریں چڑھائی جائیں گی اور فاتحہ خوانی ہو گی۔ ان تقریبات کا اہتمام تحریک پاکستان ورکرز ٹرسٹ کے اشتراک سے کیا جا رہا ہے۔